Kvenfélag Ásprestakalls
Kvenfélag Ásprestakalls var stofnað 24. febrúar 1964 og voru stofnfélagar 99 talsins. Fram til ársins 1968 voru félagsfundir haldnir í Safnaðarheimili Langholtssóknar. Meðal þess sem félagið tók sér fyrir hendur fyrstu árin var fótsnyrting fyrir aldraða og var sú aðstaða í Holtsapóteki, jólaskemmtanir fyrir börn voru haldnar í Laugarásbíói og sendar voru jólagafir til einstæðinga á Hrafnistu og á Kleppsspítala. Einnig stóð kvenfélagið fyrir fjáröflunum með kaffisölu, bingó, bösurum o.fl. Með aðstoð Bræðrafélags Ásprestakalls var keypt húseignin Hólsvegur 17, árið 1968 og var því gefið nafnið Ásheimilið. Þar átti kvenfélagið sitt blómaskeið. Þar var starfað að fótsnyrtingu, basarundirbúningi og þar voru félagsfundir haldnir. Einnig var þar opið hús fyrir aldraða og haldin voru ýmis námskeið. Á þessum árum var keyptur sá borðbúnaður sem við búum að enn í dag, einnig fermingarkyrtlar o.fl. Árið 1974 var Ásheimilið selt og gekk andvirði þess til kirkjubyggingarinnar. Fyrsti formaður kvenfélagsins var Guðrún S. Jónsdóttir, þáverandi prestsfrú og stýrði hún félaginu í 10 ár. Þá tók við formennsku Kristín Hinriksdóttir og leiddi hún félagið í tvö ár, eða þar til það var lagt niður og nafni þess breytt í Safnaðarfélag Ásprestakalls.
Safnaðarfélag Ásprestakalls
Eins og fram kemur hér að ofan var Kvenfélagi Ásprestakalls breytt í Safnaðarfélag Ásprestakalls hinn 16. maí 1976 og fengu þá karlmenn jafnt sem konur inngöngu í félagið. Samkvæmt 2. grein laga safnaðarfélagsins er tilgangur þess að styrkja og styðja kirkjulegt starf í Ásprestakalli svo og önnur menningar- og mannúðarmál innan sóknarinnar.
Hvernig rækir safnaðarfélagið það sem kveðið er á um í umræddri lagagrein? Fyrst og fremst með því að auka samskipti fólks í sókninni og um leið er reynt að afla fjár, bæði til kirkjunnar og félagsstarfsins. Þannig hefur safnaðarfélagið m.a. keypt fellihurð þá sem skilur að safnaðarheimili og kirkjuskip. Einnig kaleik og 30 sérbikara til að nota við altarisgöngur. Þá stendur félagið straum af kostnaði við barnastarf kirkjunnar og einnig gefur það fermingarbörnum áritaðar Biblíurn í upphafi vetrar.
Aldraðir gleymast ekki og félagið sendir bíl til allra dvalarheimila og stærstu fjölbýlishúsa í sókninni til að auðvelda fólki að komast til kirkju. Einnig býður safnaðarfélagið öldruðum íbúum í sókninni í veglegt kaffisamsæti á degi aldraðra (á Uppstigningardegi). Kirkjudagur safnaðarfélagsins er í mars og félagsfundir eru að jafnaði haldnir einu sinni í mánuði frá október til maí og þá er leitast við að hafa eitthvað efni til skemmtunar og fróðleiks.
Félagar í safnaðarfélaginu geta orðið allir íbúar í Ásprestakalli, karlar og konur. Einnig þeir sem stuðla vilja að málefnum og framgangi félagsins, þó þeir séu búsettir annars staðar. Ef þig langar til að styrkja starf félagsins þá þarft þú að láta skrá þig og greiða félagsgjald sem er 2000 kr. á ári. Sjötíu ára og eldri greiða ekki félagsgjald nema þeir óski þess sjálfir.
Eftirtalin hafa gengt stöðu formanns í Safnaðarfélagi Ásprestakalls:
Guðrún S. Jónsdóttir 1976-1981, Helga Guðmundsdóttir 1981-1984, Róbert Sigurðsson 1984-1985, Guðrún Magdalena Birnir 1985-1992, Hafþór Jónsson 1992-1996, Þóranna Þórarinsdóttir 1996-2005, Lára Axelsdóttir frá 2005 - 2008 og Jóhanna Friðriksdóttir frá 2008.
